Meghalaya NGO-te Assam MLA chungah lungawi lo

Meghalaya-a orga- nisation hrang hrangte chuan an state-a inner line permit (ILP) system hman an phutna sawiseltu, Assam-a Congress MLA chu na takin an sawisel. 

NGO hrang hrangte hian Confederation of Meghalaya Social Organizations (CoMSO) hmingin ILP system hman thuai phutin nawrh an huaihawt a, hemi rual hian Assam MLA chungah hian action lak an phut bawk. 

Assam-a North Karimganj bial MLA, Kamalakhya Dey Purka- yaastha hian tun hnaiah Meghalaya chief minister Conrad K Sangma hnenah lehkha thawnin, Meghalaya-in ILP hman an phut chungchang chu ngaihtuah ṭha leh turin a ngen a ni. Congress MLA hian Meghalaya hi major transit point a nih avangin ILP system hi hman a nih chuan a ṭhenawm state-te nen mipui kalkualna kawngah harsatna a awm thei dawn a ni, a ti. 

CoMSO chairman leh Hynniewtrep Youth Council (HYC) president Robertjune Kharjahrin chuan Assam MLA chungah hian an lawm lo hle tih sawiin, a thusawi avang hian a laka action la ngei turin Meghalaya Legislative Assembly chu an phut tih a sawi.  ILP system hman chungchanga resolution chu state MLA 60-ten lungrual taka an siam a ni, tiin a sawi. 

Kharjahrin chuan Assam MLA-in Meghalaya MLA-ten lungrual taka resolution an siam tawh a lo dodal chu Meghalaya House zah lohna a ni, a ti. ILP system hman thuai an phut thu sawiin, CoSMO chuan an thil phut hi sorkar laipuiin a tihlawhtling thuai lo a nih chuan kum 2013 assembly inthlan tur chu boycott-ah an vau bawk. CoMSO-ah hian HYC, Hynniewtrep Achik National Movement, West Khasi Hills Students Union, Confederation of Ri-Bhoi People leh Jaintia Students’ Union-te an tel a ni. 

State governor Satya Pal Malik chu Inrinni khan Delhi-ah a zin a, union home minister Amit Shah hmuin, state dinhmunte a sawipui dawn a, NGO hrang hrangten ILP system hman thuai an phut chungchang pawh sawipui a tum.