Assam: CM-in Singapore President hmu

Assam chief minister Himanta Biswa Sarma chu ni hnih cham turin Singapore a zin a, nimin khan Singapore president Tharman Shanmuaratnam a hmu.

CM Sarma leh President Shanmuaratnam-te hian India-Singapore Comprehensive Strategic Partnership-a an project thawhte an sawi dun a ni. Hei bakah hian Advantage Assam 2.0 investment summit neih tur chungchang an sawi bawk.

Sarma chuan kum 2022-a President Shanmugaratnam-a'n Assam a tlawh chu sawi chhuakin, hruaitu pahnihte hian inthlunzawmna ṭha nei turin hma an lo la tawh a ni.

Advantage Assam 2 summit neih tura Singapore in a thawhpui tur chu lawmawm a tih thu Assam CM chuan a sawi a, Singapore nena semiconductor, green energy leh technology lama hmasawnna tur sector tharah an thawh dunna tih chak zel tur pawh a nghakhlel hle tih a sawi.

CM Sarma hian nimin vek khan semiconductor industry hruaitute pawh a kawm a, Assam sorkarin Jagiroad-a Electronic City siam a tumnaah thawhpuiah a sawm a ni. Sarma hian Advantage Assam 2.0 investment summit an neih tur pualin South Korea leh Japan-ah investor-te pawh a lo hmu tawh a, summit an neih tur chuan an state tan investment tam zawk a hip luh a, sorkar hna tam zawk siam leh, Assam mipuite tan entrepreneurship lamah pawh hun ṭha tak a siam chhuah ngei a beisei thu a tarlang.