Meghalaya: Meghalaya leh Assam-in video conference nei dawn

Meghalaya leh Assam chuan district council inthlan lo awm tura ramri buaina hmuna inthlanna muanawm tak neih a nih theih nan February 14 hian video conference an nei dawn. Jaintia Hills Autonomous District Council inthlan hi February 21 a neih tura ruahman a ni.

Meeting-ah hian Block 1 huam chhung, a bikin West Jaintia Hills leh Karbi Anglong district-ah te dan leh thupek kenkawh dan tur ngaihtuah ho a ni ang.

Hynñiewtrep Border Dispute Redressal Forum (HBDRF) chuan inthlan neih chhung hian venhimna tih chak a nih theih nan hma a la nasa hle a, tun hmain inter-state ramri, Assam-a Khasi chengte vau an nih ṭhin thu an sawilang bawk.

HBDRF chairman Chandame Sungoh chuan district administration- in vote thlak tute himna a pek a pawimawh thu a sawi. Labang Nongphyllut-a chengte hian Meghalaya huamchhunga awm an la duh a, Assam aṭanga hmasawnna awm te duh loin inthlan hi an boycott bawk a ni.