BOP tihchangtlunna atan Assam-in Rs vbc 100 ruahman

Assam sorkar chuan Border Out Posts (BOP) thuam ṭhat leh tihchangtlunna tur scheme a siam dawn a, a thawh khatna atan cheng vaibelchhe 100 a ruahman. 

Scheme hnuaiah hian sipaite tana remchang turin barrack-te chu BOP bulah sak an ni ang. Scheme thawh khatnaah BOP 50-te chu Rs vbc 100 sengin thuam ṭhat an ni dawn a ni. State chhunga BOP dang pawh he scheme hnuaiah hian tihchangtlun vek an ni ang. 

Chief minister Sarbananda Sonowal chuan Home and Border Protection and Development Department meeting-a thu a sawiah, home department ngenna angin, state sorkar chuan BOP 100  hnenah motor cyle pali leh bicycle pariat ṭheuh a pe dawn a, hei bakah hian fuel pawh a tumsak tel dawn tih a sawi. 

Border area-a hmun kilkhawr zawka BOP enkawltute harsatna hmachhawn hrang hrangte pawh hriatpuiin state sorkar chuan theihtawp a chhuah zel dawn tih CM chuan a sawi. Inter-state boundary area-a cheng mipuite himna pawh ngaihtuah sak zel an ni ang, a ti.