Manipur: Ibobi Singh-a'n CM thlang fel thuai turin BJP hruaitute phut

Manipur chief minister hlui leh Congress legislator party hruaitu, Okram Ibobi Singh chuan BJP central hruaitute chu state chhunga remna leh muanna a awm theih nan a rang lama Chief Minister thlang turin a ti.

Thawhlehnia chanchinthar lakhawmtute a kawmnaah, Ibobi Singh chuan BJP kaihhruai sorkar laipuiin a duh phawt chuan N Biren Singh-a'n banna a theh luh ni leh Governor-in a banna a pawmsak ni, Pathianni khan Chief Minister thar tur an ruat nghal thei a ni, tiin a sawi. CM ban avanga Assembly session, February 10-a neih tur pawh ṭhulh tak pawh ṭhulh kher loa kaltlangpui theih a nih thu a sawi bawk.

Ibobi Singh chuan central BJP hruaitute thupek angin zanlai pelh hnuah pawh Chief Minister thar lakluh theih a nih thu a sawi a, hun rei lote chhung atan pawh ni se, State Assembly suspend chu thil ṭha a nih loh thu a sawi. Hei bakah hian tun dinhmuna Manipur-a President's rule hman pawh a dodal thu a sawi. Sorkar laipuiin President rule hman tura ruahmanna a siam a nih chuan Manipur mipuite tan hriatthiam a harsa hle dawn a ni, a ti.

Tun thlenga Chief Minister thar tur ruat a la ni lo chu prime minister Narendra Modi leh home minister Amit Shah-te kaihhruai sorkar laipuiin Manipur a ngaihthah zia lantirtu a ni tiin Ibobi Singh chuan a sawi. N Biren Singh a ban tak avangin Manipur MLA-te chu Assembly hruaitu thar an thlan phalsak an ni tur a ni, a ti bawk.