Bangladesh textbook-a Arunachal dah dan China-in sawisel

China chuan Bangladesh textbook-a Asia map dahah, Arunachal Pradesh leh Ladakh-a Aksai Chin te India ram chhunga dah an nih avangin a lungawi lo hle a, Bangladesh hnenah complaint a thawn.

China palai chuan Bangladesh hian an rama Grade 4 textbook-ah leh Department of Survey website-ah dik lo takin heng rambial pahnihte hi India ram angin a dah a, hei hi thu dik tihhmelhemna a ni, a ti.

Bangladesh hnenah complaint a thehluhah, China chuan zirlaibua Asia map an dahah China leh India ramri an dah dan chu a dik lo a ni tiin, a bikin Arunachal Pradesh leh Aksai Chin a dahna chu a dik lo tih an sawi. An tih dik loh hi siamṭha leh turin an phut bawk.

India leh China hian khawthlang lamah Ladakh leh khawchhak lamah Arunachal Pradesh thlengin ramri km 3,488-a thui an ni. China hian Arunachal Pradesh hi a ram chin niin a chhal reng a, Tibet province huam chhunga mi tiin a sawi. Hei vang hian India sorkar hotuten Arunachal Pradesh an tlawh ṭhin pawh a lo sawisel fo a ni. Ladakh-a Aksai Chin pawh kum 1962-a India nena an indonaa a lak a ni tih a sawi bawk a ni.

Bangladesh Ministry of Education leh National Curriculum and Textbook Board chuan China aṭangin complaint dawng mah se, textbook te hi chhut chhuah vek tawh anih avangin siamṭhat a harsa tawh dawn niin an sawi.