Manipur police hotu hluiin a medal pe kir

Manipur-a NAB (Narcotic Affairs of Border) additional SP hlui, Thounaajam Brinda Devi-i chuan kar liam ta Zirtawpni khan ruihhlo dona, 'War against Drugs' chungchanga a thawh ṭhat avanga chawimawina a dawn, Chief Minister’s Police Medal for Gallantry chu sorkar hnenah a pe kir leh. 

Devi-i hian ruihhlo tam tham tak man chungchanga thubuai siamsak, ADC Chanel chairman  leh BJP member, Lhukhosei Zou leh midang parukte thiam chantir an nih avangin chawimawina a dawn hi a pe kir leh a ni. 

Kum 2018, June 20 khan Brinda Devi kaihhruai police team chuan Zou chenna, sorkar quarters an dapnaah ruihhlo, international market-a cheng vaibelchhe 28 hu an man a ni. Thubuai ziak lutin, Devi-i hi investigating officer (IO) a ni nghal bawk a, Manipur High Court-a affidavit a thehluhah he thubuaiah hian politician leh police officer inhnamhnawihte pawh an awm tih a sawi. Mahse special court-a he thubuai ngaihtuah a nih laiin hmun dangah transfer a ni.

Court chuan thubuai chhuizui dan chu a ṭha tawk lo nia sawiin, Zou leh inhnamhnawiha puh midangte chu thiam a chantir. Hei vang hian a medal dawn hi pe kirin, Devi chuan thubuai an siam chuan awmzia a neih tak loh avangin medal chu kawl tlakah a inngai lo tih a sawi.