Assam-ah Night Navigation System hmang dawn

Assam Transport Minister Chandra Mohan Patowary chuan, Sadiya, Lakhimpur, Majuli leh Guwahati-ah zan lama mipuite chetvelna a awl sam zawk theihna turin 'night navigation system' hman a nih tur thu a sawi.

Patorwary chuan, “A bikin Majuli mipuite chuan harsatna an tawk nasa ṭhin hle a, luipui kama awm a nih avangin an harsatna sukiang tur hian 'night navigation system' ruahman sak an ngai a ni. State sorkar chuan Jorhat - Majuli inakarah a thlawna lawng hmanga inkalpawhna tur 'free ferry service' a ruahman dawn a ni" a ti. Sadiya leh Majuli-te hi tuiin a hual thliarkara awm an ni a, kawng tam takah tihhmasawn an ngai a, chu chu eco-tourism lama hmasawnna chikhat a ni, a ti bawk.

Transport Minister chuan Assam-a inland water transportation atan, World Bank chuan cheng vaibelchhe 1,000 invest turin thutlukna a siam tawh tih a sawi. Act East Policy-a hmalakna peng pakhat, Assam leh Bangladesh-te'n tuipui kaltlanga an insumdawn tawnna tur chu hawn thuai a ni dawn tih a sawi. Assam Chief Secretary VK Pipersenia pawhin tui chunga inkalpawhna chu tunlai khawvel changkanna nena inhmeh tak leh, environment tichhe lo zawnga hmalakna duhawm tak a nih thu a sawi ve bawk.