Assam CM-in Financial Package ngaihtuah sak turin ngen

Assam Chief Minister Sarbananda Sonowal chuan Thawhṭanni khan Union Finance Minister Arun Jaitley hmuin an state-a chhiatna hrang hrang tuarte chhawmdawlna tur financial package ngaihtuah sak turin a ngen.

Sonowal chuan Union Finance Minister hnenah hian an state-in chhiatna hrang hrang an tawh te a thlen a, tuilian avanga harsatna tawkte chhawmdawlna pek an nih vek theih nan hma lakpui turin a ngen a ni. Assam sorkar hian sum lamah harsatna a tawk mek nia sawi a ni a, tuilian leh leimin avanga state mipui nuai chuang zetin harsatna an tawh bawk avangin sorkar laipui ṭanpuina a beisei a ni. Kum 2016-17 financial year-a state sorkar sum indaih lohna chu vaibelchhe 2,880.91 a ni.

Sonowal chuan thuthar thehdarhtute hmaah, "State chhunga tuilian leh chhan hrang hrang vanga chhawmdawl ngaite chhawmdawl turin state sorkar chuan hma a la mek a ni. He mi chungchanga hma min lakpui tur hian Prime Minister leh Finance Minister pawh ka dawr tawh a ni" a ti. Sorkar laipui chuan an harsatna tawh chu a ngaihthah lo tih sawiin, mipuite chu dawh thei taka nghak turin a ngen. Assam sorkar chuan tuilian avanga kum tin harsatna namen loh a tawh ṭhin sukiang turin kawng hrang hrangin hma a la mek reng a ni, a ti bawk.