Buaina chinfelna hun ṭha a ni: Acharya

Nagaland Governor P B Acharya chuan Naga politics buai chungchanga sorkar laipui leh all Naga group leader-ten inbiakna an neih mek chu he buaina chinfel nana hun ṭha ber niin a sawi.

Naga politics buaina chungchangah hian sorkar laipui chuan inbiakna vawi eng emaw zat a neihpui tawh a, August 3, 2015 khan sorkar laipui leh National Socialist Council of Nagaland -Isak-Muivah (NSCN-IM) te chuan ‘Framework Agreement’ an lo ziak tawh a ni. Inrem lailawkna ziah ni tawh mah se inremna tluantling ziah a la ni lo a, inbiakna kalpui leh mek a ni. Hemi chungchang hi governor chuan sawi chhuakin, Prime Minister Narendra Modi-a kaihhruai sorkar a din lai hi buaina chinfel nana hun ṭha ber a ni, a ti. Political party, NGO, students’ organisation leh civil society-te remna tluantling ziah a nih theih nana a eng zawnga thil thlir turin a ngen.