Assam sorkar-in Cargo Station din dawn

Assam sorkar chuan sum-dawnna lama huang zauhna pakhat atan bungraw phurte chawlhna (cargo station) a din dawn. Airports Authority of India pawhin Lokapriya Gopinath Bordoloi International Airport-ah international standard runway thar a siam belh dawn.

He mi chungchangah hian Assam Chief Minister Sarbananda Sonowal leh Transport Minister Chandra Mohan Patowary-te chuan Union MoS for Civil Aviation Jayant Sinha chu Thawhlehni khan an kawm. Patowary chuan Assam Industrial Development Corporation (AIDC) chuan cargo station sak hna hi a thawk dawn a ti a, National Airports Authority of India pawhin cargo station siam tumin ruahmanna a siam mek niin a sawi.

Meeting-ah hian LGBI Airport tih changtlunna tur sawiho a nih thu sawiin, international standard-a siam tum a ni tih minister chuan a sawi. Airport tihchangtlun hian nasa takin South Asian ramte nena inthlunzawmna kawngah a pui thei dawn tih sawiin, hei hi sorkar laipuiin Act East Policy a kalpui meka hmalakna pakhat a ni, a ti bawk.

State Transport Minister chuan Guwahati, Dibrugarh, Tezpur, Silchar, Jorhat, Lakhimpur leh hmun dangah te airport tam zawk din a ṭul tih hriain state sorkar chuan hma a la mek a, Union Minister chuan Dibrugarh leh Silchar-ah te airport din a remti niin a sawi. State sorkar chuan Rupshi leh Ledo-ah te airport din a nih theih nan ruahmanna a siam leh mek niin a sawi bawk. Meeting-ah hian state chhunga hill district-a chengte tana helicopter service siam dan tur leh hmarchhak state dangte nena inkal pawhna tur te sawiho a ni.