Assam-ah damchhung tang tur mi 245 chhuah tum

Assam sorkar hnuaia State Level Committee on Remission (SLCR) chuan chhan hrang hrang vanga damchhung lungin tang tura tih mi 245-te chhuah turin sorkar-ah rawtna a thlen a, sorkar thutlukna nghah mek a ni.

Damchhunga lungin tang tura tihte hi kum 14 leh ai aia rei jail tang tawhte an ni a, SLCR chuan heng mite chhuah tur hian sorkar-ah a ngen sak.

Hemi chungchangah hian Supreme Court chuan thu pek chhuain, an tan hun chhung pawh tawi sak turin state sorkar a lo hriattir tawh nia tarlan a ni. SLCR Additional Chief Secretary (Home) TY Das chuan Home and Political department-ah memorandum thehluh a ni tawh tih a sawi. Damchhunga tang tura tihte hi Guwahati, Nagaon, Tezpur, Jorhat, Dibrugarh leh Silchar jail-ah dah an ni.

Tang zinga ṭhenkhat chu jail-ah kum 20 chuang hun hmang tawhte an ni. Home Commissioner LS Changsan chuan tang chhuah tura tihte hi mi 245 an ni a, hun reiloteah chhuah theih beisei an nih thu a sawi. Heng mite chungchang hi ngun takin commitee chuan a zir chiang tawh a, home deparment-ah report pek luh a ni tawh a, a changtu Chief Minister thutlukna nghah mek a ni, a ti. District Magistrate, Additional Director General of Police (Prisons) leh Superintendent of Police-te pawh hriattir an ni tawh niin a sawi bawk.