Assam sorkarin zirtirtu 11,000 la dawn

Assam sorkar chuan BEd degree emaw a tlukpui diploma nei emaw, Teacher Eligibility Test (TET) paltlang zirtirtu 11,000 a la thar dawn.

Education Minister Himanta Biswa Sarma chuan zirtirtu lak thar tur hi upper primary teacher-ah mi 5,144 leh lower primary teacher tur mi 6,134 a nih thu a sawi. Zirtirtu lak tura atan hian August 31 khan advertisement tih chhuah a ni a, kumin December-ah chuan appointment siam fel hman beisei a ni, a ti a, Sixth Schedule hnuaia mite erawh a huam tel dawn lo tih a sawi. Sarma chuan appointment chu post basis-a kalpui a nih tur thu sawiin, form pawh online-a kalpui a ni, a ti. Sorkar laipuiin thuchhuah a lo siam tawh angin, zirtirtu lak thar tur reng rengah candidate-te chuan TET an paltlang vek a ngai tawh a ni.

Minister Sarma chuan state sorkar chuan educa-tion, health leh tourism a ngaipawimawh tih a sawi. Assam Tourism tih hmasawnna turin brand ambassador atan milar sawm an nih thu a sawi lang bawk. Minister chuan tourism tih hmasawn nan hian state sorkar chuan theihtawpin hma a la mek a ni a ti a, India ram mai ni lo khawvel huapah phochhuah tum a ni, a ti. Brand ambassador atan hian Bollywood star - Priyanka Chopra, Hrithik Roshan leh Deepika Padukone bakah cricketer Sachin Tendulkar-te hming pawh lamrik a ni.