Meghalaya: Zirna tihchangtlun nan school clustering model hmang dawn

Meghalaya sorkar chuan zirna kalphung tih changtlunnan leh school tih tlemna turin school clustering model hman a tum. Hemi atana thutlukna hi Education Department-in Zirtawpnia review meeting an neih ṭumin an siam a ni.

Education Department secretary, Swapnil Tembe chuan school pakhata section hrang hrangte zirna in pakhata awm chungin a hranin an thawk niin a sawi. LP, UP, Secondary, leh Higher Secondary te awmna school hrang hrang chu pali anga chhiar an ni. Heng school-te hi pakhata awm tur an nih avangin zawmkhawm an tum a, he hmalakna hian state chhunga school awm tih tlem nan a pui dawn a ni, tiin Tembe chuan a sawi. Meghalaya hi state tenau ni mah se, school 14,500 chuang a awm a ni.

Pre-primary aṭanga higher secondary thleng inzawmkhawmna tur hi National Education Policy (NEP) zulzui a ni bawk. Tembe chuan an system hman mekah zirlaiten an zirna kawngah vawi li tal school thlak an ngai a, hei vang hian zirna chhunzawm lo pawh an tam phah a ni, a ti. Kalphung thar hi zirna lama dinhmun nghet leh an zir chhunzawm zelna siam tumna a ni, tiin a sawi.

He kalphung thar kalpui tur hian official-te chuan school hrang hrang an tlawh dawn a, data ṭul la khawmin, sorkarah report an thehlut ang. Hei bakah hian Meghalaya-ah hian sorkar hriatpui loha din, school 500 vel a awm. Sorkar laipui thupek zawmin tunah chuan state sorkar chuan heng zirna inte hi a zirchiang dawn a, danin a phut ang an tlin leh tlin loh an enfiah dawn a ni.

Education officer-te chu endik hna chak zawka kalpui tura hriattir an ni a, school-te'n zirtirtu an ngah tawk em tih leh, uniform, lehkhabu leh thil pawimawh dangte an neih leh neih loh enfiah turin hriattir an ni. Langtlang leh rintlak taka kalpui a nih theih nan an thil hmuhchhuahte hi school monitoring app-ah chhinchhiah a ni ang.

Sorkar-in model cluster school a kalpui hian zirna lama hmasawnna a thlen bakah, zirna in tan mamawh tam zawk pek theih niin, harsatna awm tawhte pawh a sutkian theih beisei a ni.