Assam-in barbed wire hmanga ramri hung phût

Assam Chief Minister Sarbananda Sonowal chuan Ningani khan sorkar laipui chu thir hling nei, barbed wire hmanga Indo-Bangladesh ramri hung tura an phût thu a sawi.

Sonowal chuan, “Indo-Bangla border chu Indian Army kaihhruaina hnuaiah thir hling nei hmanga hung turin sorkar laipuiah vawi eng emaw zat rawtna thlen alo ni tawh a ni" a ti. Tuna ramri hungna chu a ṭhat tawk tawh loh thu sawiin, mi tam tak, a bikin Bangladesh mi leh sa ten dan loin awlsam zawkin Assam an luh theih phah a ni, a ti. Dan loa ramri kan ṭhin te titawp tur hian state sorkar leh sorkar laipui ṭanrual a ngaih thu sawiin, ngaihthah mai chi a ni lo, a ti. Dan loa Bangladesh aṭanga Assam-a lut leh khawsa zui ta mi tam tak an awm tih sawiin, hei hi chinfel thuai a nih loh chuan buaina nasa zawk a thlen theih thu a sawi bawk.

CM chuan a kaihhruai sorkarin ni 100 chuang mipuite tan hna a thawk tawh tih sawiin, eiruk dona kawngah pawh sorkar chu a dinna ngaiah ala ding reng a ni, a ti. Congress sorkar hun laiin eirukna a hluar hle niin Sonowal chuan a sawi a, a minister-te pawhin a thu mai niloin a takin eirukna an do niin a sawi. Assam chu eirukna laka fihlim state a nih theihna turin sorkar leh mipuite
ṭanrual a ṭul thu a sawi.

National Registration (NRC) kalpui mek sawi chhuakin, ram leilung fa dik takte hming chauh ziahluh a nih theihna turin state sorkar chuan fimkhur takin a kalpui a, dan loa pem lut mi eng emaw zatin document lem hmangin NRC-a an hming a chuan theihna turin an bei a, hna pawh a hautak phah hle a ni tiin CM chuan a sawi. Mahse hnathawktuten rim tak leh fimkhur taka an kalpui avangin 2017 kum tir lamah NRC hi peih fel hman beisei a ni, a ti.

Assam CM chuan tun hnaia state chhunga chhiatna hrang hrang thlengah sorkar chuan chak takin hma ala tih sawin, tuilian tuarte chhawmdawlna pawh ngaihtuah sak an nih thu a sawi. Helte pawikhawihna thleng
ṭhin chu pawi a tih thu sawiin, Kokrajhar leh Tinsukia-a nunna chan leh hliam tuarte pawh zángnadawmna pek an nih tur thu a sawi. State sorkar chuan firfiaka chetna reng reng chu a do zel dawn a ni tiin, tun hnaiah chhiah tihsan ni mah se Delhi ai pawhin Assam-ah food item man a la tlawm zawk tho niin a sawi. State sorkarin sum lamah harsatna a tawh chhan chu Congress sorkarin leiba cheng vaibelchhe 17,000 a hnutchhiah vang niin a sawi bawk.