AP-ah sualna a pung chak

Union Home Ministry-in tun hnaia 'Crime in India' report-a tihchhuah-ah Arunachal Pradesh-ah sualna nasa takin a pung tih tarlan a ni. AP-ah hian kum 2015 chhung khan IPC tlawhchhanin thubuai ziahluh 2,968 a awm a, Special & Local Laws (SLL) hnuaiah thubuai 181 ziahluh a ni bawk.

Home Ministry hnuaia National Crime Records Bureau (NCRB) chuan tunhnai khan report tichhuakin, kumin bikah AP-ah hian mi nuai khat zelah IPC tlawhchhana thubuai ziahluh 227.8 awm ang a ni a, Special & Local Laws hnuaiah 13.9 awm anga tarlan a ni. Union Home Minister Rajnath Singh chuan August 29 khan 'Crime in India' report hi a tlangzarh a, kum 2014 aiin kuminah hmeichhe chunga hleihlenna a hluar tih tarlan a ni.

Arunachal Pradesh-ah hian kum 2015 chhung khan pawngsual thubuai 71 ziah luh a ni a, pawngsual tum thubuai 12 a awm bawk. Kum 2015 chhungin hmeichhhe chunga hleilenna thubuai report 102 awmin, hmeichhe chunga mawilo leh zahpahlo taka chetna thubuai report pahnih a awm bakah, pawngsual leh pawngsual kaihhnawih thubuai 181 ziahluh a ni. Hetih lai hian pasalten an nupuite chunga kutthlak leh rawng taka an chetna thubuai 66 zet ziahluh a ni tawh bawk.

IPC tlawhchhana tualthah thubuai ziahluh tawh 57 awmin, tualthah tum thubuai 58 a awm tawh bawk. Tharum thawhna, invau leh ralthuam chelekna chi hrang hrang 458 zet ziahluh tawh a nih bakah, thihna thlenga thubuai ziahluh 119 zet a awm tawh a ni. Heng bakah hian IPC hnuaiah rukruk, mi thil neih hnehchhuh leh inrawk thubuai 913 zet a awm tawh a, crime rate san chhohna hi 70.1% zet nia tarlan a ni.