Assam : KMSS leh pawl dang 70-ten political party thar din dawn

All Assam Students Union (AASU) leh Asom Jatiyatabadi Yuva Chatra Parishad (AJYCP)-in political party thar, Assam Jatiya Parishad (AJP) an din hnuah, Krishak Mukti Sangram Samiti (KMSS) leh organisation dang 70-te thawkho chuan tun thla chhung ngeiin political party thar an din ve dawn tih an sawi. 

KMSS hruaitute chuan Assam mipuite ṭhatna tur atana thawhpui tura AASU, AJYCP leh AJP an sawmna chu an la chhang lo tih an sawi. Nakkuma state assemblyi inthlan neih tur atana thawhpuia an sawmna hi September 20 thleng hun an pe a, hemi chhung hian chhanna dawng lo mah se, thawhho theih an beisei reng thu an sawi. 

Pawl hrang hrangte 'one party and one symbol' hnuaia awm rawt chungchangah ngaihdan hrang hrang pawh a tam zawk tih an hriat thu KMSS  hotute chuan an sawi a, mahse an state ṭhatna tura rorellai BJP bakah Congress-AIUDF thawkdunte hneh an nih theihna tura pawimawh a nih thu an sawi a ni. 

Political party thar an din tur chungchangah organisation leh regional party hrang hrangte pawh a inbiakna an neihpui mek a, an tum ber chu party huamzau, pawl hrang hrang aiawhte tel theihna siam a ni, an ti.