Delhi-ah 'Tribal Unity Day' hmang

Manipur Tribals Forum (MTFD)-te chuan Nilaini khan New Delhi-a Jantar Mantar-ah “Tribal Unity Day” an hmang.

“Tribal Unity Day” hi Manipur sorkarin anti-tribal bill pathum a pass duh lohna leh, bill dodal nana Outer Manipur hill/tribal peoples’ movement kalpuina a tribal martar mi pakuate hriatrenga pualin hman a ni. MTFD thuchhuah chuan Chief Minister Ibobi Singh-a kaihhruai sorkar chuan tribal martar mi pakuate dikna chu a rahbeh sak niin an sawi a, tribal-te chuan ngaihsak an hlawh lo hle tih an sawi. Sorkar chuan tlangrama chengte hamṭhatna a ngaihthah tih sawiin, phaizawla chengte tan chauha hma la ṭhinah sorkar an puh.

MTFD thuchhuah chuan, tlang rama cheng tribal-te nghawng thei bill reng reng chu an dodal zel dawn tih tarlangin, sorkar chu phaizawla chengte duhsak bikah an puh. Phaia cheng mi pakhat vote leh tlang rama cheng mi pathum vote chu a intluk tawk vel niin an sawi a, hei hian tribal-te dinhmun chiang takin a tarlang niin an sawi bawk.

Anti-tribal bills duh-lohna lantira nunna chan ta tribal mi pakua te chu tun thlengin phum an la ni lo a, an dikna haichhuak turin an bei zel dawn tih MTFD thuchhuah chuan a tarlang. Tribal mi pakua thih danah hian state sorkar chuan FIR ziah luh a phalsak lo nia sawi a ni. MTFD chuan heng martar-te dikna haichhuak tur hian sorkar laipui chu che chhuak turin an phut tih an sawi bawk.

Manipur (Hill Areas) District Council Act, 1971 chu a hming mai a nih thu “Tribal Unity Day” ah hian tarlan a ni. District council-in state sorkar aṭanga fund a dawn
ṭhin pawh a hun taka pek chhuah a ni ngai lo a, chu chuan district council-te chu a hming maia din a nih zia a tilang chiang hle niin MTFD chuan an sawi. Sorkar laipui chu tribal-te ngaihthahah an puh bawk. “Tribal Unity Day” ah hian tribal ṭhahnem tak an fuankhawm a ni.