Question paper putruk vangin Assam SI recruitment exam cancel
Assam-a sub-inspector (SI) of police recruitment examination, Pathiannia neih tura tih chu exam ṭan hma lawkin social media lamah question paper a putruk avangin paper hi cancel nghal a ni.
He thil thleng chung chang hi chhui chiang turin chief minister Sarbananda Sonowal chuan thupek a tichhuak nghal bawk.
State Level Police Recruitment Board (SLPRB) buatsaih, written test examination hi Pathianni chhun dar 12-a ṭan tura tih a ni a, mahse Pathianni khan question paper hi a darh a ni. Assam Police Recruitment Board chairman Pradeep Kumar chuan paper hi WhatsApp lamah thehdarh niin, amah ngei pawhin a dawng tih a sawi.
A dawn hnu hian original question paper a nih leh nih loh an enfiah nghal thu sawiin, original ngei a nih avangin exam pawh cancel nghal a ni a, CID-ah thubuai ziahluh a nih dawn tih a sawi.
Paper putruk chungchang hi recruitment board hian chawhma dar 11:30 ah an dawng ve chauh a, an enfiah hnuah exam hi an cancel ta a ni. Exam cancel a nih thu centre hrang hrangte hriattir a nih hian candidate ṭhenkhat chuan eng emaw zat an lo chhang hman tawh a ni.
New Delhi-a cham mek, CM Sonowal chuan he thil thleng a hriat veleh thil awm dan chhui chiang turin DGP Bhaskar Jyoti Mahanta chu a hriattir nghal a, question tiputrutute chu man chhuah ngei a, an chunga hremna na tak lekkawh turin a ti.