Central Trade Union-te'n nawrh huaihawt Tripura, Assam leh Manipur-ah nunphung khaihlak

Kar kalta Zirtawpni khan Central Trade Unions (CTUs) pawl hrang hrang 10-te chuan darkar 12 awh nawrh an huaihawt avangin hmun hrang hrangah nunphung a khaihlak nasa hle. CTU thuchhuah chuan NDA sorkarin “anti-labour” policy a kalpui duh lohna lantir nana huaihawt an nih thu an sawi.

Hmarchhak state Tripura, Assam leh Manipur-ah pawh nawrh huaihawt hian nunphung a tikhaihlak hle.

Nawrh huaihawt a nih vang hian Tripura-ah chuan dawr, sumdawnna hmun, bank, sorkar office leh zirna in zawng zawng khar vek a ni a, lirthei che vel hmuh tur a awm lo bawk. Central trade union-te'n nawrh an huaihawt avang hian buaina chhuak lian tham a awm lo niin police thupaungtu Uttam Bhowmik chuan a sawi.

Hetihlai hian railway service hnathawkte chu lungawi lohna lantirtute chuan Agartala railway station leh Dharmanagar-ah te an dang. Hnathawktu dan an nih vang hian Tripura leh Bangladesh inkalpawhna pawh khar lailawk a ni. Centre of Indian Trade Unions’ (CITU) Tripura unit President Manik Dey chuan, "Mipuiin min thlawp ṭha hle a, a hlawhtling ah kan ngai. Sorkar laipuiin “anti-labour” policy a kalpui chu ṭha kan tih loh bakah hlawh chungchangah kan lungawi lo a ni" a ti. Left Front party-Communist Party of India-Marxist (CPI-M) chuan nawrh huaihawt hi an thlawp a, CPI-M bakah hian Indian National Trade Union Congress te chuan an thlawp bawk. Trade union-te chuan an thil phut chi hrang hrang 12 zet sorkar laipuiah an thlen a ni.

Bharatiya Janata Party (BJP) hnuaia trade union hrang hrangte chu nawrh thlawp lo tura ngen an ni. Central trade union-te nawrh huaihawt vang hian Assam-ah pawh nungphung a khaihlak a, dawr, sumdawnna hmun, sorkar office leh hmun pawimawh dangte khar a ni a, lirthei tlan hmuh tur a awm meuh lo. National bank zawng zawng khar a nih avangin dawrtu an awm lo a, Insurance company bakah post office thlengin khar vek a ni. State dang ang bawkin Assam-ah hian school leh college-te khar vek a ni bawk.

North East Frontier Railway thupuangtu chuan, nawrh huaihawt a nih vang hian rel service tihtawp lai lawk a ngai hial a, service awm ve bawk mah se dan pangngai anga an tlan loh thu a sawi. Barak Valley-ah pawh nawrh hian nghawng a nei lian hle a, Guwahati-ah pawh nawrh huaihawttu mi 500 vel chu police-te'n an man a ni.

Manipur-ah chuan Coor-dinating Body of Trade Unions, Manipur (CBTUM) leh All Manipur Surrendered Welfare Association-te chuan nawrh an huaihawt a, state trade union chuan Central Trade Unions (CTUs) nawrh huaihawt thlawpna lantirin zing dar ruk aṭanga tlai dar ruk thleng nawrh an huiahawt ve bawk. Manipur-ah bik hian darkar 65 awh tur association of surrendered militants-te'n nawrh an huaihawt chhunzawm a, vawiin tlai dar thum hian a tawp ang. Sorkarin hun rei tak chhung an welfare policy a tih khawtlai sak vang nia taerlan a ni. Nawrh chhunzawm a nih vang hian National Highway-a lirthei che vel pawh eng emaw chen a khaihlak rin a ni.