Rijiju-a'n police constable lak dan dem

Union MoS Home, Kiren Rijiju chuan police constable hna lak chungchangah Manipur Chief Minister Okram Ibobi Singh-a kaihhruai Congress sorkar chu a dem thu a sawi.

Rijiju chuan police constable hna lak dana lungawi lote chu BJP chuan a thlawp thu sawiin, a bikin constable candidate zinga written test patlang tawhte tawrhna chu a hriat thiam-pui thu a sawi. State sorkar chuan police constable hna lak chu dik takin kalpui se a duh tih sawiin, lungawi lohna lantirtute pawh tharum thawh lo zawnga che turin a ngen. Union Minister chuan nakuma state election neih turah a vawi khatna atan BJP a sorkar dawn tih a sawi bawk. Rijiju hian Manipur a cham chhung hian party worker-te chu BJP head office, Imphal-ah a kawm a, Congress kaihruaiin kum 15 ro a rel chhunga mipuiten an hmelhriat chu-rorelna dik lo, eirukna, nawrh leh sorkar do zawnga chetnate a nih thu a sawi.