Indopui II laia airport-te din thar leh tum

Minister of State for Civil Aviation Jayant Sinha chuan hmarchhak huam chhunga indopui II-na hun laia airport lo din tawh, hman chhunzawm loh eng emaw zat chu din ṭha leh turin sorkar laipui chuan ruahmanna a siam tih a sawi.

Jayant Sinha chuan chuan nikhat chamin Tripura a tlawh a, Agartala khawpuiah Chief Minister Manik Sarkar nen Agartala airport, international airport-a hlan kai a nih theihna tur an sawi dun a, hemi atan hian cheng vaibelchhe 400 ruahman a ni. Jayant Sinha chuan hmarchhaka airport tam zawk chu indopui II hun laia din te a nih thu sawiin, a tam zawk chu hman chunzahwm a ni lo niin a sawi. Heng airport 50 vel zet te hi din thar leh a nih theihna turin sorkar laipui chuan ruahmanna a siam mek a, hmarchhakin inkalpawhna kawnga hma a sawn zel theih nana ruahmanna pakhat a nih thu a sawi.

North Tripura-a Kai-lasahar airport chu state sorkar nena ṭangkawpin tihchangtlun hna thawh a nih tur thu minister chuan sawiin, hmarchhak huam chhung hmun hrang hranga airport-te tih changtlun a nih chuan
ṭhenawm ram Bangladesh, Myanmar leh Thailand-te nen inkalpawhna kawngah pawh nasa takin hmasawnna a thlen theih a beisei thu a sawi. Sinha chuan a bikin Tripura, Manipur leh Mizoram-te chu ngaih pawimawh an ṭul thu a sawi bawk. Minister of State for Civil Aviation chuan hmarchhakah hian private airline eng emaw zatin bu khuar tumin hma an la mek tih sawiin, man tlawm zawka chuan theihna tur air ambulance a awm thuai beisei a nih thu a sawi.

Tripura CM chuan Bangladesh khawpui Dhaka leh a khawpui pawimawh dang Chittagong leh Syhlet-te chu Agartala airport nena thlunzawm a nih theih nana hmalakpui turin Minister of State for Civil Aviation Jayant Sinha hi a lo ngen ve bawk.