Assam health minister-in DoNER minister kawm

Assam Finance, Education leh Health Minister ni bawk Dr Himanta Biswa Sarma chuan Union Minister of State (Independent Charge) for Development of North Eastern Region (DoNER) Dr Jitendra Singh chu Delhi-ah hmuin state chhunga development project kalpui mekte a sawipui.

Dr Jitendra Singh chuan Assam State Assemly-in lungrual taka GST Bill an pass thei chu lawmawm a tih thu Dr Sarma hi lo hrilhin, Assam sorkar chu kawng hrang hrangah puih zel a inhuam thu a sawi. Assam sorkarin education leh health sector a dah pawimawh thiam chu fakawm a tih thu sawiin, tun hnaia Department of Atomic Energy, Government of India leh Tata Memorial Centre Mumbai ṭangkawp ten Cancer Institute an din chu state sorkar hmalakna vang a nih thu a sawi. Ministry of DoNER hmalaknain Guwahati University-ah ‘Brahmaputra Study Centre’ din tura hmalak mek a nih thu Dr Sarma a lo hrilh.

Dr Sarma chuan DoNER Minister chu Assam state administration review meeting Guwahati-a neih turah tel turin a sawm nghal a ni.