Khawvela river island lian ber Majuli

Assam-in hmun hmingthang a neih zinga mi Majuli Island chu khawvela 'River Island' lian berah kar kalta Ningani khan puan a ni.

Majuli Island hian Guinness World Record-a lang phak Brazil-a Marajo Island (sq km 880) chu a rawn khum ta a ni.

Guinness World Record-a tarlan a nih dan chuan Brazil-a Marajo Island hian kum 40 vel kal ta chhung khan a ram zau zawng hmun thuma ṭhena hmun khat chu a hloh a ni. Majuli Island pawh hi Brahmapurtra lui lian nasa tak vang leh leilung luang ral nasa tak vangin a ram zau zawng hi a zim tial tial nia tarlan a ni ve bawk. Majuli Island-ah hian mihring 1,60,000 an cheng a, Misings leh Majuli hnamte an cheng a ni. Assam Chief Minister Sarbananda Sonowal pawh Majuli constituency aṭanga tlantlin hi a ni.

Majuli hi heritage site-ah puan a nih tak avang hian a venhim leh enkawlna mumal zawk a awm theih na turin Assam sorkar chuan Setember 8 khian Majuli-ah Cabinet Meeting neih a nih tur thu a puang a, Majuli chu district puitlingah hlankai nghal a ni ang.

Majuli Island zau zawng hi sq km 1,250 a ni a, a ram zau zawng sq km 352 zet chu a hloh tawh nia hriat a ni. He Island hi Brahma-putra lui leh Subansiri lui infinin a siam a ni a, Assam khawpui Guwahati aṭanga km 200 vela hla a ni.