Mamit SP-in thawhhopuiah Thuthar thehdarhtute a sawm

Mamit SP thar Abhishek Dhania chuan, nimin khan a pisa-ah thuthar thehdarhtute a kawm a, venhimna lama thawktute nen a theih ang anga inpawh taka thawhho puiah a sawm

Abhishek Dhania chuan thuthar thehdarh-tute chu mipui tana thudik rintlak leh pawm ngam chhuah hram hram tur te, tunlaiah social media hmanga mipui tichiai zawnga thuchhuah awm ṭhin lakah fimkhur turte leh Mamit police-in thu-thar an neihte chu rintlak a nih leh nih loh engtik lai pawha zawhfiah theih reng an nih thute a sawi.

Mamit district chu international boundary leh inter state boundary-a awm a nih avangin Issue lian tak tak neih chang a awm ṭhin tih sawiin, Mamit SP chuan he mi kawngah hian inpawh tlang taka thawkho turin thuthar thehdarhtute hi a sawm a ni.

Thusawitu dang Mamit DIPRO Paul Rokima chuan SP office aṭanga thuchhuah tur awmte chu DIPRO kaltlanga puangzar ṭhin turin a ngen.

Mamit District MJA president C Lalthanzuala pawhin thu sawiin, "Mamit police-te an hnathawhna kawngah theihtawp chhuahpui zel kan tum a, mamawhna min nei a nih chuan kan in hawng reng a ni," a ti.