CAA : NPF-in Kohima-ah meeting ko

Naga People's Front (NPF) chuan Citizenship (Amendment) Act (CAA) chungchangah naktuk hian Kohima-ah consultative meeting a ko.

NPF-in hriattirna a tihchhuahah, he meeting Disciplinary Action Committee (DAC) rawtna bawhzuiin NPF president Shurhozelie Liezietsu-a'n a ko tih a sawi. Meeting-ah hian central office bearer (COB), NPF MLA, organisation leh cell president te bakah sawmbikte an tel ang. Meeting-ah hian CAA leh a kaihhnawih thil hrang hrangte an ngaihtuah dawn a ni. 

Assam Congress chuan January 13 hian Assembly-ah an state pum chu Citizenship (Amendment) Act (CAA) huam tir lo tura phutna resolution putluh an tum. 

Assam PCC president Ripun Bora chuan state sorkarin resolution hi a pu lut duh lo a nih pawhin he Act in Assam a huam tel lohna turin Congress chuan hma a la dawn tih a sawi. Assam Legislative Assembly special session hi January 13 hian neih a ni dawn a, he hunah hian Scheduled Caste leh Scheduled Tribe reservation pawhsei dan tur an ngaihtuah ang. 

Chief minister hlui Tarun Gogoi chuan CAA hian Assam Accord mai ni lo preamble thlengin a bawhchhia a ni tih sawiin, an state chu dinhmun ṭha lo takah a din  mek avangin he Act hi sawiho ngei a ngai a ni, a ti.

NPP in CAA chungchangah sawi lo turin party mite chah National People's Party (NPP) chuan an party mi leh sate chu CAA chungchangah ṭawngchhuak ve lo tur leh, CAA dodalna lantirna rally huaihawtahte tel lo turin a chah. 

NPP  national secretary Thomas A Sangma chuan thuchhuah siamin, party member zawng zawngte chu party president, Meghalaya chief minister Conrad Sangma hnen aṭanga phalna an hmu hmasa a nih loh chuan CAA chungchangah ṭawngchhuak ve lo turin a ti. 

NPP hian CAA hi thlawpin, an party MP neihchhuan Agatha Sangma pawhin Parliament-ah bill thlawp lamah a vote a ni. Hemirual hian Conrad Sangma chuan NPP chuan Meghalaya-a Inner Line Permit (ILP) system hman leh, an state pum chu CAA huam tir loh a phut tih a sawi.