BJP worker-te'n Manipur-ah lungawilohna lantir

Manipur BJP worker-te chu Zirtawpni khan State Assembly kawtah an pungkhawm a, police constable lak kalpui dan dik tawk lo avangin Deputy Chief Minister Gaikhangam chu bang turin an phût.

BJP worker-te hi police-te chuan lo dangin, buaina tenau chhuakah BJP mi leh sa parukin hliam an tuar. BJP worker-te hi president K. Bhabananda Singh chuan hoin, Zirtawpni-a Manipur Legislative Assembly session ṭan chu tihbuai tumin an bei a ni. Police-te'n an lo dan avang hian Assembly gate aṭanga metre 200 vela hlaah lungawi lohna lantirin kawngsirah an ṭhu. Party worker-te hi kum 2013-a police constable laka written test paltlang tawh mi eng emaw zatte chuan thlawpin, MLA Thangmeiband Khumukcham Joykisan chenna in kawtah an pungkhawm zui bawk.

State BJP hruaitu Bhabananda chuan Assembly an pan chhan chu BJP thil phutte chu sorkarin a ngaihthah vang niin a sawi. Buaina siam chu an tum ber a ni lo tih sawiin, "Sorkar chuan kan thil phut hi hria se, hma la rawh se tih kan hriattir duh a ni" a ti. Constable lak danah thil fel lo tam tak a awm tih sawiin, a mawhphurtu Deputy Chief Minister leh home minister-te chu bang tura an phut thu uar takin a sawi. "Constable lak dan hi chhui chian kan phut a, thil dik lo titu chu dan anga hrem ni rawh se. Physical test pawh a tharin sorkarin kalpui leh rawh se", a ti.

Zirtawpnia thil thleng vanga hliam tuarte hi hospital-ah dah luh an ni a, an ngaihtuahawm loh nia tarlan a ni. Bhabananda chuan hliam tuarte chu a tawrhpui thu sawiin, an thil phut chu a hlawhtlin hma loh chuan a tawp thlenga an beih tur thu a sawi.