Assam CM-i'n Indo-Bangla border tlawh

Assam Chief Minister Sarbananda Sonowal chuan Indo-Bangla border, Mankachar sector tlawhin ni hnih hun a hmang a, dan loa ralthuam tawlhruk, inrukbo, dan loa ramri kan ṭhin leh helte chetna do turin ramri thawm ṭhat a
ṭul thu a sawi.

Assam CM hian Man-kachar sector a pan hma hian sorkar laipuiah Indo-Bangla border chu barbed wire hmanga hung ṭhat a ṭul thu a lo thlen tawh bawk a ni.

Sarbananda Sonowal hian Hasichar Border Outpost huam chhunga awm Dewaner Alga chu a tlawh nghal a, helai hmun hi dan loa ramri kan ṭhin tamna hmun nia sawi a nih avangin venhiamna khauh zawka kalpui a ṭul thu a sawi. Inthlan dawna mipuite laka an lo tiam tawh ang ngeiin a kaihhruai sorkar chuan Indo-Bangla border kaltlanga Assam-a pemlut ṭhinte titawp turin hma a la reng tih a sawi a, ram leilung fate himna chu an ngaih pawimawh ber a nih thu a sawi nawn leh bawk.

Sonowal chuan ṭhenawm ram Bangla-desh aṭanga dan loa Assam-a pemlut ṭhinte dang tur leh titawp tur chuan mipuiten sorkar hmalakna an thlawp ṭhat a ngai a ni, a ti. Assam chauh ni lo hmarchhak state-te pawh ramri depa awm an nih avangin kawng hrang hrangah thawhhona ṭha an mamawh tih a sawi bawk. CM chuan state sorkar hmalakna tiṭhuanawp zawnga che lo tur leh, ramri chu politics inchirhtheh nana hman a rem loh thu sawiin, ṭanrual a ngaih zawk thu a sawi.

CM Sarbanda Sonowal hi All Assam Students Union (AASU) hruaitu-ten an zui a, South Salmara-a Mancachar district chu a tlawh nghal bawk. Mancachar district thar hi Assam khawpui Guwahati aṭanga km 290 vela hla a ni. Sonowal zuitu zingah hian MLA Angoorlata Deka, Pranab Kalita, Ashok Singi, Ashok Singhal, Ramendra Narayan Kalita leh Mancachar bialtu MLA Motior Rahman Mondal-te pawh an tel a ni.