Tripura sorkarin Agartala-Kolkata direct train service phut

Tripura sorkar chuan an state khawpui Agartala leh Kolkata inkara direct train service ngaih-tuah sak turin sorkar laipui a ngen.

Sorkar thuchhuah chuan nitin Agartala aṭanga Kolkata pan mi tam tak an awm ṭhin tih sawiin, thlawhtheihna chuan man a sang avangin mi tam takin harsatna an tawk a ni, a ti. Heng zingah hian damlo eng emaw zat an awm ṭhin a, mipuiten harsatna an tawh mek sutkian a nih theih nan hian sorkar laipui chu Agartala-Kolkata inkara direct train service tir a nih theih nana hma la turin a ngen a ni.

Tripura Transport Minister Manik Dey chuan August-a Union Railway Minister, Suresh Prabhu-a'n Agartala-New Delhi direct train service a hawn khan, August thla chhung ngeiin Agartala-Kolkata direct train service tir a nih theih nan hmalak a nih tur thu a lo sawi tawh tih sawiin, tun thlengin hmalakna a la awm lo niin a sawi. "Union Railway Minister-in hma lak a lo tiam tawh ang ngei hian sorkar laipui chu chak zawka hma la turin kan ngen a ni" Manik Dey chuan a ti.

Hetihlai hian Agartala-New Delhi direct train service pawh hi a mumal lo hle nia sawi a ni. Hemi chungchang hi Union minister Prabhu henah pawh thlen a nih tawh thu Dey chuan a sawi.