Bangladesh kaltlangin Tripura-ah oil thawn lut dawn

Tripura-in kawngpui chhia avanga hun rei tak harsatna a tawh chuan ziaawm lam a la pan thei meuh lo a, Bangladesh kaltlangin Tripura-ah hian September 7 aṭangin petrol leh diesel thawnluh a nih tur thu sorkar official chuan a puang.

Tripura state-in oil lakluh kawngah harsatna a tawh sutkian a nih theih nan hian Ministry of Petroleum and Natural Gas, Goverment of Indian leh Roads and Highways Department (RHD) Bangladesh chuan August 18 khan Memorandum of Understanding (MoU) an lo ziak tawh a ni. Indian Oil Corporation Ltd (IOCL) chuan oil thawnluh hna hi a thawk dawn a, September 7 aṭang hian ṭan hman beisei a ni.

Oil hi Bongaigaon Assam aṭangin Bang-ladesh panpui a ni ang a, Tripura-ah chawkluh leh tur a ni ang. Kawng thui zawng hi km 136 a ni dawn a, tuna Assam -Tripura inkar km 400 aiin a hnai zawk dawn a ni. Hei hian hun leh sum tam tak luangral tur a veng hle tura ngaih a ni bawk.

India leh Bangla-desh-te inremna hian September 30 thleng a awh dawn a, petrol leh diesel bakah hian Motor Spirit, Kerosene Oil leh Liquefied Petroleum Gas te a huam dawn nia tarlan a ni. Hemi hma hian Bangladesh sorkar chuan a ram kaltlanga nitin mamawh Tripura-a chaw lut turin India sorkar chu phalna a lo pe tawh bawk. Food Corporation of India (FCI) chuan kar kalta chhung khan buhfai tonne 2,350 zet chu Kolkata aṭangin Bangladesh kaltlang hian a thawnlut hman a ni.

Kum 2012 khan India leh Bangladesh sorkar chuan Bangladesh-a Ashuganj port hmanga Tripura-ah bungraw thawnluh an lo remti tawh bawk.