Mipuite dikna chanvo rahbeh a ni : Sharmila

Manipur 'iron Lady' Irom Sharmila-i chuan south Mani-pur-a Loktak Lake chu kar kalta Inrinni khan a tlawh a, a pual hian Sendra Community Hall-ah vantlang inkhawm buatsaih a ni.

Sharmila-i chuan, “State sorkar chuan a ram mipui sang tam takte dikna chanvo min rahbeh sak mek a ni. He thil hi kan ngawih bopui mai tur a ni lo a, inpumkhatna nen kan dikna chanvo nei tur hian beihlet a ngai a ni", a ti. Sharmila-i hi Jawaharalal Nehru Institute of Medical Sciences (JNIMS)
aṭangin August 27 khan chhuah a lo ni tawh. Tun hnai khan Ukhrul district-a zin a duh thu a lo sawi tawh a, mipuite nen inkawmna hun hman a duh thu a sawi. Sharmila chuan, “Ukhrul mipuite nen hian inkawmna hun neih ka duh a, an harsatna tawhte hriatsak a hmalakpui ka duh a ni. Phaizawl leh tlang rama chengte inkara inthliarhranna nasa tak awm nuai bo tur hian hma lak a ngai a ni" a ti.

Sharmila-i hi IPC section 309 (attempt to commit suicide) tlawhchhanin mahni imntihhlum tumah puh a ni a, court-ah vawi eng emaw zat a in lan tawh. Tun hnai khan court-ah inlan lehin, a thubaui awrh mek chu chaw nghei a tawpsan tawh avangin tihtawp sak turin court a lo ngen tawh a ni.