Assam railway sector tan Vaibelchhe 7,000 ruahman : MoS

Union Minister of State for Railways, Rajen Gohain chuan Assam-in nasa zawka railway sector lama hma a sawn theihna turin Northeast India for Railway Project hnuaiah cheng vaibelchhe 7,000 rua-hman sak a nih thu a sawi.

Minister hian NF Railway headquarters Guwahati-ah thuthar thehdarhtute kawmin, Tinsukia-Guwahati leh Naharlagun-Guwahati inkarah rel service tir tura pawmfel a nih tawh thu a sawi. AC 3-tier train, Hamsafar chu Guwahati-Bangalore inkarah tlan tir tum a ni a, Kolkata paltlang tura ruahman a ni. Hei bakah hian Agartala-Kolkata inkarah train service siam belh tura hma lak mek a nih thu Gohain chuan a sawi. September 12 hian double railway line siamna tur project lungphum a nih tur thu leh, thla reilo te hnuah hna ṭan beisei a nih thu a sawi bawk.

Gohain chuan Guwa-hati leh Agyathuri railway station-te chu world class station-ah siam tum a ni a ti a, hemi atan hian Public Private Participation (PPP) mode hman a nih tur thu a sawi. Lumding leh Tinsukia railway station-te pawh a ṭul dan anga tihchangtlun a nih tur thu sawiin, insurance scheme hman a nih hunah chuan passenger-te chuan zángnadawmna cheng nuai 10 thlenga an dawn theih tawh tur thu a sawi.

Union MoS Gohain chuan Indian Railway hmalaknain hmarchhak hmun eng emaw zatah tourist circuit din turin hma a la mek a ni tih sawiin, hmarchhak state chu tourism lamah nasa zawka tihmasawn tum a ni, a ti. Heng bakah hian Salona-Khumtai, Sibsagar-Jorhat leh Tezpur-Silghat-ah te train service thar hawn belh tum a ni a, New Jalpaiguri-Guwahati pawh electric hmanga tlan tir tum a nih thu a sawi bawk.