NESAC system hmangin project 700 vil dawn

Hmarchhak huam chhunga North Eastern Council sum hmanga thawh, sorkar project 700 vel zet tihkhawtlai a awm nia tarlan a ni a, heng project hna thawh hrang hrangte hi North Eastern Space Application Centre (NESAC) siam satellite sytem hmanga vil an ni dawn.

NESAC sytem hi kum 2011 khan a hman ṭan a ni a, kum 2012 khan NEC pawmpuina hmuin hmarchhak state pariat-a district 36 a vil dawn a ni.

NEC Planning Advisor C H Kharshiing chuan NESAC technology hian project 700 vel chu hneh takin a vil thei dawn a, project hrang hrangte hmasawn dan pawh an thlithlai thei reng dawn tih a sawi.

NEC hian North Eastern District Resources Plan (NEDRP) tana sum ruahman, cheng nuai 144 zinga nuai 50 chu a pe chhuak tawh a ni. NEDRP hi kum 2011 khan Meghalaya-ah bul ṭan a ni a, kum 2012 khan hmarchhak state pariat-a geospatial data enkawlna atan NEC chuan a pawm a ni. NESAC director PL N Raju chuan he programme hi centre-in programme a siam zinga hlawhtling ber pawl a nih thu a sawi.