Meghalaya-ah cyber crime thubuai 273 ziaklut

Shillong Times chanchinbuin Right to Information Act (RTI) hmanga zawhna a zawh chhanna aṭanga a landanin kum 2012-2016 chhungin Meghalaya-ah cyber crime thubuai 273 ziahluh a ni a, heng zingah hian 57-te chu thutlingah ngaih a ni.

East Khasi Hills bikah chuan 2012-16 April thla thleng khan cyber crime kaihhnawih thubuai 39 ziahluh a ni. Cyber crime hian social media - facebook, Instagram whatsapp leh a dangte a huam a, mi tihmualpho tumna leh mipat hmeichhiatna lam hawi thlalak leh video te a tam ber a ni. East Khasi Hills police-te chuan cyber crime thubuai ziahluh zingah hian state chhung mai ni lo state pawn thlenga report an dawn thu an sawi.

South West Khasi Hills-ah chuan cyber expert an awm lo tih tarlan a nih bakah cyber crime cell a awm lo bawk.

Hetih lai hian East Garo Hills-ah chuan cyber crime thubuai paruk ziah luh a ni tawh a, thiam loh chantir erawh an awm lo. South Garo Hills district-ah chuan thubuai pahnih ziahluh a ni a, North Garo Hills-ah pali leh Ri Bhoi district-ah pahnih ziahluh a ni bawk. Special Director General of Police (CID) chuan cyber crime atan bik hian budget siam a nih loh thu a sawi.