Ban ka tum lo : AP Governor

Arunachal Pradesh Governor Jyoti Prasad Rajkhowa chuan, "Governor ka nihna aṭang hian ka bang dawn lo a, President-in bang tura min duh a nih chuan min ban zawk mai rawhs e" a ti.

Rajkhowa hi a hriselan
ṭhat tawk loh vangin hun rei tak chhung enkawl a ni a, Supreme Court-in Arunachal Pradesh-a Congress sorkar din leh tura thupek a chhuah pawh khan chawlh hmangin hmun dangah a awm a ni. Guwahati-a hmunpui nei TV channel DY365 chuan tunhnai khan Governor hi an kawm a, “Ka hna aṭang hian ka bang dawn lo a, hna tlin lo leh ban tlak ka nih chuan President-in min ban mai rawh se" tiin Rajkhowa chuan a sawi.

Rajkhowa hi ban mai tur anga sawi a ni fo a, hei hi hriain amah pawhin bang tura an duh a nih chuan Prime Minister leh a cabinet pawhin President hnenah rawt an thlen mai tur a ni, a ti. Governor hi Guwahati-ah a awm mek a, a hriselna a ṭha chho zel nia tarlan a ni.

Hetih lai hian Rajkhowa hi a hriselna a ṭhat tawk loh avangin telephone hmangin August 27 khan a hna bansan mai tura ngen niin tarlan a ni. Hemi chungchang hi Rajkhowa chuan sawi chhuakin, "Phone call hmanga bang mai tura hrilh ka nih kha mak ka ti takzet a, inzahlohna a ni. thudik a nih leh nih loh ka hriat loh avangin Union Home Minister Rajnath Singh pawh phone hmangin ka zawt hial a ni" a ti. Home Minister hian chutiang thil engmah a hriat loh thu a lo hrilh hnuah Arunachal Pradesh Governor hna chu a thawk zui leh mai tih a sawi bawk.

August 30 khan sorkar laipui aiawh chuan phone hmang veka be lehin a hriselna chu ni 47 chhung enthlak a nih tur thu an hrilh nia tarlan a ni. Rajkhowa hian Assam chief secretary hna a lo thawk tawh ṭhin a, kum 2015 June khan Arunachal Predseh Governor atan hian lakluh a ni.