Assam-in HS exam-a zirlai hmeichhia tiṭhate scooter sem

Assam sorkar chuan Higher Secondary examination, 2020-a zirlai hmeichhia ti ṭha, first division-a pass chinte chu Dr Banikanta Kakati Meri Award hlanin, scooter a sem. 

First division-a pass chin zirlai hmeichhia hi 22,245 an awm a ni. State sorkar hian Pragyan Bharati scheme hnuaia sorkar flagship programme hnuaiah zirlai hmeichhia tiṭhate lawmpuina hi a pe a ni. Zirlaite hnena scooter semna atan hian sorkar chuan cheng vaibelchhe 144.30 a seng. 

Pathianni khan chief minister Sarbananda Sonowal leh education minister Himanta Biswa Sarma-te chuan Kamrup leh Kamrup (M) district-a hun buatsaihah scooter hi an sem a ni.   District dangah pawh sem chhunzawm a ni ang. 

Scoooter an sem turah hian a dawng tur zirlaite hi duh an thlan tir a, an zinga 22,034 chuan petrol hmang an thlan laiin, zirlai 211 chuan battery hmang an thlang a ni.