Meghalaya-ah Mother Teresa Film Festival buatsaih

Mother Teresa International Film Festival (MTIFF) 2016 chu Thawhlehni khan Meghalaya khawpui Shillong-ah ṭan a ni a, ni li chhung a awh ang.

He film festival-ah hian tun hnaia Catholic Pope-in mi thianghlima a puan tak Mother Teresa-i chanchin leh a hnathawh ṭhenkhatte film hmanga pholan a ni. MTIFF 2016 hi U Soso Tham Auditorium-ah neih a ni a, hemi hnu hian Jowai-ah neih leh a ni dawn a, West Jaintia Hills-ah September 14 hian ni li awh turin he festival hi chhunzawm a ni ang. India ram hmun hrang hrangah festival hi neih chhynzawm tum a ni a, India ram mai ni lo khawvel ram hrang 50-ah neih tura ruahman a ni bawk.

MTIFF 2016-ah hian St. Teresa-i chanchin leh a hnathawh tarlanna film 20 leh documentary bakah short film eng emaw zat chhuah a ni ang.

Meghalaya Governor V. Shanmuganathan chuan festival hawnna hun hi a hmang a, zirlai naupang bakah mi ṭhahnem tak an pungkhawm a ni. Governor chuan, “Mother Teresa hian hmangaihna te, remna te, chakna leh beiseina te khawvel pum tan a hnutchhiah a ni" a ti. Mirethei leh pachhiate tan nu a ni a, a hnathawh zawng zawng hi khawvel chuan a theihnghilh ngai dawn lo a ni, a ti. Governor Shanmuganthan chuan Mother Teresa nen hian 1990s vel khan Calcutta-ah an lo inhmu tawh tih sawiin, Pathian hmangaihna thu a sawite chuan a hneh hle tih a sawi.

Festival hawnnaa tel Shillong Archbishop, Dominic Jala pawhin Mother Teresa chanchin tarlangin, a hnathawh ropui zia leh midangte tana nun hlan mi a nih thu sawiin, mi ropui a ni, a ti a, film emaw lehkhabu hmang maia a nihna tak tarlan harsa khawp niin a sawi. Festival hawnnah hian photographer leh filmmaker, Gautam Lewis buatsaih “Mother Teresa and Me” pholan a ni bawk.