Senior teacher-te Gazetted status pek an ni ang : Khandu

Arunachal Pradesh Chief Minister Pema Khandu chuan Itanagar-a inkhawm buatsaihah an state-a senior teacher-te chu gazetted status pek an nih tur thu a puang.

CM chuan Continuous and Comprehensive Evaluation (CCE) System chuan zirna kawngah rahṭha a chhuah mek niin a sawi a, zirtirtute chu zirlai naupangteah thiamna tak tak tuh theih tura ṭan la turin a fuih. Khandu chuan Arunachal Pradesh Public Service Commission hnuaiah zirtirtu lak thar a nih tur thu a puang bawk. He huna tel Education Minister Honchun Ngandam pawhin thu sawiin, zirtirtute taihmakna leh thawhrimna vang liau liauin an state-a ziak leh chhiar thiam chu 77% tling thei a nih thu a sawi. Literacy rate a san zel theih nana ṭan la sauh sauh turin kal khawmte chu a fuih a, zirna chu state sorkar ngaihpawimawh berte zinga mi a nih thu a sawi. Minister chuan class room ṭha tawk lo te, tui leh inthiarna ṭha tawk lo leh eng ṭha tawk lo bakah CBSE result ṭha tawk lo ṭhin siam ṭha turin sorkar chuan hma a la mek niin a sawi.