Majuli Island district-ah puang dawn

Khawvela river island lian ber Majuli Island chu vawiin hian district-ah puan a ni dawn a, India rama river island, district-a puan hmasa ber leh awmchhun a ni ang.

Majuli bial aṭanga thlan tlin Assam Chief Minister Sarbananda Sonowal chuan district-a puanna hun hi a hmang dawn a ni. District lawmna hi ropui taka hman tum a ni a, cultural troupe-te chuan hnam lam chi hrang hrang an en tir dawn a, Majuli-a cheng hmun danga hnathawka awmte pawh he ni hmang tur hian an haw khawm beisei a ni. Chief Minister chuan nimin khan Majuli hi a pan a, vantlang inkhawm buatsaih a nih dawn bakah, thuthar thehdartute kawmna hun a hmang ang. Vawiin vek hian SDO (Civil) conference hall-ah cabinet meeting neih tura ruahman a ni. District puan inkhawm hi Deputy Commissioner’s office-ah neih tur a ni.

Majuli hi Jorhat district sub-division-a awm niin, a ram zau zawng hi sq km1,250 a ni. Tun hnai khan khawvela river island lian berah puan niin, Guiness Book of World Records-ah ziahluh a ni.