IFFI 2020 atan Manipur film pahnih thlang

Manipur film pahnih, feature film Eigi Kona (Stallone My Pony) leh non-feature film 'Highways of Life' te chu nakkum January 16 aṭanga neih ṭan tur,  Indian Panorama of the 51st International Film Festival of India (IFFI 2020)-ah  thlan tel an ni. 

Eigi Kona hi  feature film niin, Highways of Life hi non-feature film a ni. Jury member 13 awmna, filmmaker leh screenwriter John Mathew Matthan kaihhruai chuan contemporary Indian film 183 aṭangin feature film 20 an thlang chhuak a, heng zingah hian minute 90-a rei, Eigi Kona hi an thlang tel a ni. He film hi Swarna Kamal awardee Bobby Wahengbam leh national awardee filmmaker Maipaksana Haorongbam-te siam niin, Dr K Sushila Devi produce a ni. Polo player leh pony-te chanchin a ni. 

 

Highway of Life hi minute 52-a rei niin, documentary filmmaker Haobam Paban Kumar kaihhruai jury member pasarihten contemporary Indian non-feature film 143 aṭanga 20 an thlan chhuah zingah a tel. He film-ah hian Manipur mipuite mamawh phurtu, truck khalhtu rualte kawngpui chhe tak karah an hun hman dante tarlan a ni. He film hi Amar Maibam siam niin, Film Division produce a ni. Highways of Life hi Dhaka-a Liberation Docfest 2020 neihah Best Film Award pek a lo ni tawh a, Kathmandu International Mountain Film Festival-ah pawh tihchhuah a lo ni tawh bawk. 

Kar liam ta khan Manipur filmmaker Borun Thokchom siam, boxer Laishram Sarita Devi chanchin short film-a siam, I Rise tih chuan  9th Mumbai Short International Film Festival-ah Best Documentary Award a lo dawng tawh  bawk a ni.