Guwahati-ah India-Bangladesh border talk nei dawn

Border Security Force (BSF) leh Border Guard Bangladesh (BGB)-te chuan vawiin aṭang hian Guwahati-ah 51st director general-level border coordination conference an nei dawn a, December 26 thleng a awh ang. 

Tun ṭuma Indo-Bangla border talk neih tur hi kum sawmli chhunga Delhi ni loa inbiakna an neih hmasak ber tur a ni. BSF aiawhte hi Director General Rakesh Asthana-a'n a ho dawn a, BGB palaite hi Major General Md Shafeenul Islam-a'n a ho dawn a ni. 

Conference-ah hian ram pahnih ramri vengtuten ramri kaltlanga dan kalha thiltih thleng ṭhin venna kawnga thawhdunna ṭha zawk an neih dan tur te, rang zawka information an inhrilh tawn theih dan turte an thlurbing ang. BSF-BGB conference hnuhnung ber chu September 16-19 inkar khan Bangladesh khawpui, Dhaka-ah neih a ni. 

Kum 1975-a joint India-Bangladesh guideline siamah ram pahnih aiawhte hi ramri chungchangah inbiakna nei fo tura tih a ni a, a vawi khatna atan kum 1975, December 2 khan Kolkata-ah hetih laia BSF director general Ashwani Kumar leh BDR (tuna BGB tih ni ta)-a director general  Major General Quazi Golam Dastgir te kaihhruaina hnuaiah inbiakna hi an nei a ni. Hemi hnu hian kumtinin kum 1993 thleng khan DGB BSF leh DG BGB te chuan meeting an nei chhunzawm a ni. 

Kum 1993 khan director general-level meeting hi kum khatah ṭum hnih neih turin rel zui a ni a, Delhi leh Dhaka-ah meeting hi neih ṭhin a ni. Meeting zawhah an thu sawiho te hi ram pahniha ministry of home affairs hnenah an thlen leh ṭhin.