Congress sorkarin Arunachal border a ngaihthah : Rijiju

Minister of State for Home Affairs Kiren Rijiju chuan sorkar hmasa Congress hun laia Arunachal Pradesh border ngaihthah a ni chu pawi a tih thu sawiin, hei hi ṭhenawm ram China chuan remchangah a hmang niin Ningani khan a sawi.

Federation of Indian Cham-bers of Commerce & Industry (FICCI ) buatsaihin Nilaini khan ‘Homeland Security, Smart Border Management’ conference neih a ni a, he hun hmanpuitu Kiren Rijiju chuan Congress kaihhruai sorkar khan ramri venhimna turin eng policy mah a kalpui lo niin a sawi. Rijiju chuan sorkar hmasa khan ramri depa awm AP leh hmarchhak hmun dangah te inkalpawhna kawngpui ṭha a siam lo a, chu chuan nasa takin ram venhim kawngah harsatna a thlen a ni, a ti.

Kum 2002-2004 inkara Deputy Prime Minister L K Advani-a'n Arunachal Pradesh a tlawh khan, sorkar laipuiin a lo ngaihthah avangin India chu, kawzau tak ang mai a nih tih pawh a lo sawilang tawh a ni, a ti. Ramri venhimna kawnga Congress sorkar hma lak chak tawk lohna chu China chuan remchangah hmangin, a bitum chat niin a sawi bawk.

Union minister chuan Jammu and Kashmir-a Ladakh pawh sawi kaiin, ramri depa awm, hmun pawimawh a ni a, mahse kawngpui ṭha siam a nih loh thu sawiin, hei hian ram venhimna kawngah harsatna thlen mek niin a sawi. Hei bakah hian prime minister hlui Atal Bihari Vajpayee-an bul a lo ṭan Pradhan Mantri Gramin Sadak Yojna kalpui a nih dan a duh khawp loh zia a sawilang bawk.

Kiren Rijiju chuan NDA kaihhruai sorkar chuan ram mipuite himna a ngaih pawi-mawhzia leh, ramri venhim kawnga sorkar laipui hmalakna te chu ‘Homeland Security, Smart Border Management’ conference-ah hian a sawi chhuak a ni.