Sonowal-a'n District puitlingah Majuli puang

Assam Chief Minister Sarbananda Sonowal chuan nimin khan Majuli chu district puitlingah a puang. State Assembly election hnuhnung berah khan Sonowal hi Majuli bial aṭanga thlan tlin a ni.

Khawvela river island lian ber Majuli hi Assam-a district 35-na a ni a, India rama island district awm chhun a ni. District hawnna inkhawm hi Deputy Commissioner office-ah neih a ni a, Majuli-ah hian Cabinet meeting neih zui a ni. Cabinet meeting-ah hian Majuli tihhmasawnna tur kawng hrangte sawi chhuah a ni. Sonowal chuan sorkarin district puanni atana September 8 a thlan chhan chu zaithiam Bhupen Hazarika piancham vawi 90-na a nih vang niin a sawi a, amah zahna lantirna chi khat a nih thu a sawi bawk. Chief Minister chuan Assam mipuite chu Majuli Island venhim leh vawn thianghlim kawnga thawhpuiah a sawm.

CM chuan Majuli-ah hian ‘Satriya’ culture center din a nih tur thu sawiin, hemi tih lar leh chawinun nan hian world class cultural university din a nih tur thu a sawi. Kum tina tuilian leh leilung luangral nasa tak vanga harsatna tawh
ṭhin sutkianna turin World Bank leh Asian Development Bank aṭangin sum puk a nih tur thu a sawi bawk. Hei bakah hian Majuli-ah hian Ayurvedic hospital din tura hmalak a nih tur thu a sawi a ni.