Myanmar kaltlangin Vietnam-ah samak ki thawnlut

Convention on Interna-tional Trade in Endangered Species of Wild Fauna and Flora (CITES)-in a tarlan danin Assam-a samak ki-te chu Myanmar kaltlangin Viet-nam-ah thawnluh ṭhin a ni.

International Union for Conservation of Nature (IUCN) hnuaia Species Survival Commission (SSC) leh African and Asian Rhino Specialist Groups bakah TRAFFIC-te chuan zirchianna neiin, an report hi CITES-ah an thehlut a ni. Report-ah hian Myanmar chu dan loa samak ki thawnchhuahna kawngpui pawimawh a ni tih tarlan a ni a, hei hi Asian Rhino Specialist Group (AsRSG) member-te pawhin an pawmpui tih an sawi. Hetihlai hian samak ki tawlhluhna pakhata an sawi ṭhin China-ah chuan kum 20 kala vel aṭang khan samak ki aṭanga damdawi siam chhuah emaw, damdawia samak ki tel reng reng khap a lo ni tawh nia tarlan a ni. Vietnam-ah chuan samak ki hi an hmang uar hle a, a man pawh a to hle.

Assam hmingthanna pakhat Kaziranga National Park-ah hian India rama samak awm zawng zawng aṭanga 82.5% zet a awm a ni. Mahse Samak ki chu sumdawn nana nasa taka hman a nih avangin an pung chak lo hle. Kum 2015 khan Assam-ah hian samak 2,401 vel an la awm anga ngaih a ni. Samak ki te hi Assam aṭangin Nepal-ah lakluh phawt a ni a, chumi hnuah China thleng lehin, Myanmar aṭangin khawvel hmun hrang hrangah thawn darh a ni ṭhin a ni. Dan kalha samak ki hmanga sumdawnna titawp tur hian Nepalese law enforcement leh Nepalese army bakah special police-te chuan kum 2013 aṭang khan hma an lo la ṭan tawh a, mahse tun thlengin he sumdawnna hi tihtawp a la ni lo.

Assam state sorkar pawhin sapeltute chetna khuahkhirh tur leh samak ki hmanga sumdawnna tihtawp tumin theih tawp chhuah mah se he sumdawnna hi a len tham em avangin tihtawp mai theih niin a lang lo.