Arunachal-in khualzin 20%-a punbelh a beisei

Arunachal Pradesh sorkar chuan ‘Songs and Dances of the North East’ festival ṭum hnihna a buatsaih avangin kumin chhungin an state tlawhtu khualzin 20% vela an pun belh a beisei.

‘Songs and Dances of the North East’ festival hi ṭum hnih buatsaih a ni tawh a, a hmasa zawk chu Meghalaya bultumin Delhi-ah neih a ni. AP sorkar chuan thla hmasa khan Mumbai-ah a huaihawt ve leh a ni. He festival-ah hian hnam zia rang, nunphung leh tihdan danglam tak tak pho chhuah ṭhin a ni a, ngaihhlut a hlawh ṭhin hle. Arunachal Pradesh Tourism Secretary Joram Bedaa chuan state sorkarin he festival a buatsaih thei hi a lawmawm hle a ni a ti a, hei hian kawng tam takah tourism lamah hmasawnna a thlen ngei beisei a ni, a ti. Kumin bikah hian khualzin 20% vela an pun chhoh beisei a nih thu a sawi.

Bedda chuan sawi zawmin, Arunachal Pradesh state dangin a neih loh thil hlu tam tak a nei a, hengte hi humhalh thiam a, vawnṭhat zel a ṭul tak zet a ni, a ti. An state chuan ramngaw, tlang leh lui mawi tak a nei nia sawiin, hengte hi thiam taka hman ṭangkai a ngai a ni, a ti. Tourism Secretary chuan Tezu-ah airport din thuai beisei a nih thu a sawi bawk. AP sorkarin “Songs and Dances of the North East” festival
ṭum hnihna a buatsaihah hian thupuiah ‘Come, Experience the North East’ tih hman a ni a, North Eastern Council (NEC)-in a sponsor a ni.