Assam: CM-in Indo-Bhutan ramria hnathawh endik

Assam chief minister Himanta Biswa Sarma chuan nimin, February 17 khan India-Bhutan international ramri, Kokrajhar district-a mi chu a tlawh a, ramri infrastructure project thawh mekte a endik.

Chief Minister hian Sikhna Jwhwlao National Park, Bismuri, Ultapani-Sarlapara leh Bhutan khua, Sarpeng-ah te hmasawna hna thawh a endik a ni. Hna thawk mek zingah hian kilometer 35-a thui kawngpui, Rs vbc 27 vel senga siam tur pawh a tel. He kawng hian Assam leh Bhutan inkalpawhna ṭha zawk a siam bakah, thawhdunna ṭha leh zau zawk pawh a siam theih beisei a ni.

Project thawh mekte a endik bakah, CM Sarma hian Sikhna Jwhwlao National Park huamchhunga tualchhung mite nen inbiakna hlawhtling tak an nei bawk. Sorkarin he biala infrastructure tih changtlun leh khawtlang hmasawnna siam a tum thu a sawi uar hle.

Sarma chuan agenda pawimawh tak, Sixth Schedule huamchhunga inrelbawlna tih chak a nih tur thu sawiin, Budget session ni khatnaa Governor thusawi tur chu thil pawimawh tak a nih tur thu a sawi bawk. State-a remna a awm theihna turin, mi zawng zawng tana inzawmkhawmna a entirna hun pawimawh tak a ni dawn a ni, a ti. Bodoland nawrh huaihawtna hmunpui ṭhin Kokrajhar-ah chuan Assembly session ni khat neih a ni dawn tih a sawi. "He hun hi chief minister ka nih chhunga thil hriatreng tur a ni," tiin prime minister Narendra Modi leh union home minister Amit Shah-te'n an thlawp avangin lawmthu a sawi bawk.

PM Narendra Modi pawhin special sitting chungchang hi X-ah a post-ah, sorkar laipui leh Assam-a NDA sorkarte chuan Bodo hnam thuam chakna leh Bodo duhthusamte hlen chhuah tumin theihtawp an chhuah a ni, a ti.