J&K aiin Manipur-ah Mihringte dikna rahbeh a hluar zawk: SC

Supreme Court chuan hun rei tak tualchhung buaina thlenna hmun Jammu and Kashmir-ah aiin Manipur-ah mihringte dikna chanvo palzutna a nasa zawk niin Nilaini khan a tarlang.

SC chuan Manipur-ah pawh Imphal chu mihringte dikna chanvo hnualsuat hluarna ber niin a tarlang a ni. National Human Rights Commission (NHRC) counsel leh senior advocate ni bawk Gopal Subramaniam chuan, "Mihringte dikna chanvo rahbeh chu dan kalh a ni, chu chu engmahin a chhan thei lo a ni" a ti. Manipur-ah hian Armed Force Special Powers Act (AFSPA) hman a nih avangin mihring dikna chanvo rahbehna hi a hluar zual nia ngaih a ni. Thubuaite pawh ziah luh ni ve bawk mah se kum thum chhungte nghah a ngai ṭhin nia sawi a ni.

Zirchianna aṭanga a lan dan chuan Manipur-ah hian danin a phal chin bakah, tharum thawhna hmanga mi nunna lak thubuai chhinchhiah 1528 a awm tawh a, 300 chuang chhinchhiah loh a awm nia sawi a ni bawk. Jammu and Kashmir leh hmarchhak state-te chu Army leh paramilitary forces-te'n chet an lak nasatna hmun nia tarlan a ni a, he mi chungchang hi National Human Rights Commission (NHRC)-a thlen a nih hnuah Parliament-ah pharh tura ruahman a ni.

Manipur leh J&K-ah hian AFSPA hman a ni ve ve a, ram ri depa awm an nih bawk avangin tualchhung buaina leh helte chetna a hluar hle. J&K-ah bik hian tunhnai tualchhung buaina chhuak nasa tak avangin thla hnih dawn curfew puan a ni tawh. Hetih lai hian Manipur-ah pawh political party leh pawl hrang hrang ten nawrh an huihawt ve reng bawk. Thawhṭanni khan Assembly session chu BJP worker-te'n tih buai tumin an bei a, Assembly Complex-ah curfew puan zui a ni. Tribal pawl ṭhenkhat ten ILP Bill pass phuta nawrh an huaihawt bawk avangin nunphung a khaihlak nasa hle.