Manipur-ah Kuki-te'n Black Day an hmang dawn

Manipur-ah Thawh-lehni khan Kuki-te'n Black day an hmang dawn a, hei vang hian hmun hrang hrangah venhimna khauh zawka kalpui a ni.

Black day hi kum 1993-a National Socialist Council of Nagalim (Isak-Muivah)-te'n Kuki tribal mi 900 an thahte hriatrengna puala hman ṭhin a ni. State chhunga police station zawng zawngte chu inralring tura hriattir an ni a, paramilitary forces leh central forces-te chu a ṭul huna che chhuak nghal thei tura hriattir an ni bawk.

Kuki Impi Manipur (KIM) leh Kuki Students’ Organisation (KSO) te buatsaihin Black day hi hman a ni a, Kuki-te chenna hmun zawng zawngah hman a ni ang. Ṭawngtai rual leh kawngzawh huaihawt a ni dawn a ni.

KSO general secretary S Haokip chuan, “Kuki chhungkuate chu kan unau famte tan kan ṭawngṭai dawn a, an dikna chanvo rahbeh sak an ni hi a pawi hle a ni" a ti. Hetih lai hian KIM-te pawhin an mihuai kalta ten an dikna chanvo an neih ngei an duh tih sawiin, India sorkar leh NSCN(IM)-te'n inremna tluantling an ziah hma ngeia chinfel an duh thu an sawi.

NSCN(IM) hian kum 1992 chho khan “land of the Nagas” an tih huamchhunga Kuki chengte chu chhuak vek turin an nawr a, hei hian chi leh chi inkarah buaina chawk chhuakin NSCN(IM) kutah Kuki mi 900 zet te chuan nunna an chan a ni. Kuki chenna khua eng emaw zat chu hal a ni a, pawisawi lo mi tam takin hliam an tuar. He thil thlengah hian Naga tribal eng emaw zatin nunna an chan bawk.