Assam : Bodoland-ah Assam Assembly Budget Session nei

State khawpui pawna Assam Legislative Assembly ṭhutkhawm hmasa ber chu Thawhṭanni khan Bodoland Territorial Region headquarters, Kokrajhar-ah neih a ni. Governor Lakshman Prasad Acharya chuan session ṭan ni hian thu sawiin, state sorkarin hmasawnna hna a thawh hrang hrangte leh a hmathlir neihte a tarlang.

Bodoland Territorial Council Legislative Assembly building-a session ni hmasa ber hman a nih hnuah, session chhunzawmna chu Guwahati-ah neih a ni tawh ang. Chief minister Himanta Biswa Sarma chuan Assam tana ni chhinchhiahtlak a ni, tiin a sawi.

Bodoland Territorial huamchhung hi district panga - Kokrajhar, Baksa, Udalguri, Chirang leh Tamulpur-ah a inzar pharh a, Constitution-a Sixth Schedule-in huamin, hei hian a hnuaia hmun hrang hrangte chu autonomy a pe a ni. Bodo-te hi Assam-a tribal community lian ber an ni a, kum 1980 chho lai vel aṭang khan Bodo state hran siam tumin tharum thawhna nasa tak a lo thleng tawh a ni.

CM Sarma chuan Bodoland chu inpumkhatna chhinchhiahna a nih tawh thu a sawi. "Kum 1985 hnu lam khan Bodoland Territorial Council bialah nasa takin buaina a chhuak a, Assam ram chu inṭhendarh tir an tum a ni. Chu buaina avang chuan mi sang tel an thi a, mahse, kum 2019 hnuah chuan prime minister Narendra Modi leh union home minister Amit Shah-te kaihhruaina avang leh Bodo hruaitute puitlinna leh hruaitu nihna an lantir avangin Bodoland chu inpumkhatna leh thawh hona chhinchhiahna a lo ni ta a ni," tiin a sawi.

Budget session hi March 25 t hleng neih a ni dawn a, finance minister Ajanta neog chuan March 10-ah 2025-26 Assam budget a pharh ang.