Smart city-a siam tur zingah Meghalaya a tel: Ampareen

Meghalaya Urban Affairs Minister Ampareen Lyngdoh chuan Prime Minister Narendra Modi-a'n June 25-a India ram khawpui 100-a smart city pro­ject kalpui tur a puanah Me­ghalaya-a khawpui pakhat a thlan tel thu a sawi.

"State chhunga khawpui (town) awm zat leh mihring awm zat azirin sorkar laipui chuan smart city project kal­puina tur India ramah khawpui 100 a thlang chhuak dawn a, heng zingah hian Meghalaya pawh thlan tel kan ni," tiin Ampareen chuan a sawi.

Smart city project kalpuina atana khawpui thlan dan tur hi stage hrang hranga neih a ni dawn a, a stage khatnaah chuan state tinin khawpui remchan dan azirin an thlang phawt ang a, sorkar laipuia Ministry of Urban Affairs-in a enfiah hnuah khawpui remchang leh ṭha zawk te chu a stage hnihna atan kawng hrang hranga buk an ni leh ang.

Stage hnihnaah hian khaw­pui hrang hrangte chuan Smart City Plan (SCP) an buatsaih ang a, plan siamnaah hian mipuite ngaihdante lain, project kalpui an tum dan leh fund an hmuh dan tur leh hmanna tur thlengin an tarlang ang. SCP chu Urban Affairs ministry-ah an thehlut leh ang a, SCP behchhanin Union Urban ministry hian smart city project kalpuina tur a thlang chhuak ang.

Smart city project chu Cen­tral Sector Scheme hnuaiah kal­pui a nih tur thu Ampareen chuan a sawi a, smart city atana thlan khawpui chuan khawpui tihchangtlun nan kum nga chhungin kum khat zelah cheng vaibelchhe 100 a dawng ang, a ti.

Smart city mission hi khaw­pui hrang hrangte tih­changtlunna atana inelna kalphunga hma­sawnna thlentir tumna a ni.